ظاهرة التريند و السوشيال ميديا

الحقيقة انا عاوز اتكلم عن موضوع مهم ،،

في ظواهر بقت بتنشط بقوة علي السوشيال ميديا و القصة اللي تنتشر بقوة و صدي كبير جداً بقت تتضرب في تلاته و اربع مرات

اولاً : قصة "ابو تورته" و هروبه والجدل الكبير الواسع اللي ظهر علي السوشيال ميديا بدءاً من جروبات سرية لـ بيدجات واسعة المجال للـ تليفزيون والميديا بكل اشكالها و نور شمعة "مصطفي ابو تورته" ينتهي ويطفي و إذ فجأة بقصة "نورا و احمد صابر" اللي اخدت نفس المنحني بدءاً من جروبات للبنات مغلقة لـ تريند وتعاطف لطرف علي حساب التاني

السؤال هنا :

هل حُرمات الناس بقيت مشاع لمجرد انك تبقي واجهة والناس تضحك عليك او تتعاطف معاك او عشان تبقي مشهور ....

ربنا أمرنا بالستر سواء ظالمين او مظلومين و حق المظلوم كده كده بيرجع وكله عند ربنا ،،

لا الواحد محتاج تريند او هاشتاج عشان يتنصر او يشفي غليله ... الواحد محتاج انه لما يكون في ضيقة و مظلوم يقفل قصته علي نفسه و اقرب الاقربين ويشكي حاله لـ ربه اللي اكيد أحن من الكل ...

ثانياً : قصة "محمود البنا"

جريمة القتل البارده اللي فكرتني بفيلم عادل امام ونيللي و فريد شوقي .... صراع الطبقات اللي بيتيح لأبن المرتاح يستبيح دم ابن الغلبان

القصة خدت مجال واسع علي السوشيال ميديا و وصلت للإعلام و حق محمود راجع ولكن ،،

ظهر بعدها و كأن القصة بتاعت محمود كانت باب لفتح موجة من قصص البلطجة والقتل العمد لـ قوي "مسنود و محمي من قوة خفية في بلدنا الشقية" بيقتل ضعيف عشان سبب تافه كنا زمان من 15 سنة بنبوس دماغ بعض ونقول لنفسنا عيب نضرب بعض علي تفاهه زي دي ...

في وقت قصير جدا السوشيال ميديا بقيت نافذة لظهور كل الجرايم المستخبية زي :

1) واحد بيصور نفسه وهو مضروب و وشه مليان دم وبيحكي قصته ان حد ضرب الضرب المبرح ده بحجة انه عاكس خطيبته

2) واحدة ام ابنها مضروب ضرب موت بصور بشعة والجاني ابن عيلة كبيرة جدا لها نفوذها وبالرغم ان المجني عليه في المستشفى الا ان الجاني بكل بجاحة بيهدد بقتل الأخ الاخر ان لم تمتنع الأم عن الكلام ونقل قصتها للسوشيال ميديا

3) شخص بيتوعد آخر بالقتل لأنه بيدعي ان الشخص ده قتل ابنه و بيطلب من الناس التضامن بنشر هاشتاج القصاص

4) سواق راكب معاه واحدة إماراتية حصل خلاف ما بينهم وصل للسباب من طرف الإماراتية والرد بالسباب من جانب السائق و تهديدها له بانها هتبلغ السفارة رغم السباب المتبادل وفي النهاية السواق اتطرد من شغله واتقطع اكل عيشه

سواء انت جاني ولا مجني عليك في انت ببساطة ممكن تكسب تعاطف و تضامن الناس بهاشتاج او تريند تركب عليه علي الجانب الاخر اللي بيتضامن معاك بيتعاطف معاك لدرجة انه ممكن يشتم و يقتل حد معارض لفكرته او كلامه

الموضوع بقي مُخيف جدآ ... السؤال هنا ؟ هنوصل لفين ....